පෞද්ගලික අංශය ආනයනය කළ සහල් මෙ.ටො 4000ක තොගයක් තවමත් රේගුවේ
පෞද්ගලික අංශය විසින් ආනයනය කළ සහල් මෙට්‍රික්ටොන් 4000ක් නිදහස් කිරීමට නොහැකිව තව දුරටත් රේගුවේ රදවා තබා ඇති බව වාර්තා වනවා.
රේගු මාධ්‍ය ප්‍රකාශක, අතිරේක රේගු අධ්‍යක්ෂ ජනරාල් සීවලී අරුක්ගොඩ මහතා පැවසුවේ සහල් ආනයනයට රජය විසින් ලබා දී තිබු කාලය අවසන් වීම හේතුවෙන් අදාළ සහල් තොගය තවදුරටත් රේගුවේ පවතින බවයි.
රට තුළ පැවති සහල් හිඟයට විසඳුමක් ලෙස සහල් ආනයනය කිරීම සඳහා රජය විසින් රාජ්‍ය වාණිජ විවිධ නීතිගත සංස්ථාවට සහ පෞද්ගලික අංශයට අවසර ලබා දී තිබු අතර එම කාලය පසුගිය 10වැනි දා මධ්‍යම රාත්‍රියෙන් අවසන් වුණු අතර, එම කාලය තුළ පෞද්ගලික අංශය සහ රජය විසින් සහල් මෙට්‍ර්ක් ටොන් 167,000ක් ආනයනය කර තිබුණා.
කෙසේවෙතත් නියමිත කාල සීමාව අවසන් වීමෙන් අනතුරුව රජය සහ පෞද්ගලික අංශය ආනයනය කළ සහල් මෙට්‍රික් ටොන් 8,000ක් වරායට ගොඩ බා ඇති බවත්,
ඉන් රජයට අයත් සහල් මෙට්‍රික් ටොන් 4,000ක් නිදහස් කර ඇති අතර පෞද්ගලික අංශ විසින් ගෙන්වු සහල් තොගය නිදහස් කිරීම සම්බන්ධයෙන් මේ වනවිට බලධාරීන් සමග සාකච්ඡා පැවැත්වෙමින් තිබෙන බව රේගු මාධ්‍ය ප්‍රකාශකවරයා වැඩිදුරටත් පැවසුවා.
