බදු නොගෙවූ මත්පැන් නිෂ්පාදකයින්ට පණිවිඩයක්
ඊයේ (24) පාඨලී චම්පික රණවක මහතාගේ ප්රධානත්වයෙන් රැස්වූ ක්රම හා විධි පිළිබඳ කාරක සභාව, 2023 වසරට අදාළව මත්පැන් නිෂ්පාදකයින්ගෙන් අයවිය යුතු හිඟ බදු මුදල් පිළිබඳව නියෝගයක් නිකුත් කර ඇත.
ඒ ජුනි මස 30 වනදා වනවිට අදාළ බදු මුදල් අයකර ගැනීමට කටයුතු කරන ලෙසට ශ්රී ලංකා සුරාබදු දෙපාර්තමේන්තුවට නියෝග කරමිනි.
අයවිය යුතු හිඟ බදු මුදල් ප්රමාණය රුපියල් බිලියන 1.1ක් බව කාරක සභාවේ සභාපති අනාවරණය කර ඇත.
බදු නොගෙවන මත්පැන් නිෂ්පාදකයින්ගෙන් බලපත්ර බදු ගෙවන තෙක් තාවකාලිකව අත්හිටුවීමට ගෙන තිබූ කාරක සභා නියෝගය නොසලකා හැර කටයුතු කිරීම පිළිබඳව මෙහිදී සභාපතිවරයා සුරාබදු දෙපාර්තමේන්තුවෙන් ප්රශ්න කර තිබේ.
බලපත්ර අහෝසි නොකොට අදාළ හිඟ බදු මුදල් වාරික වශයෙන් අයකරගැනීමේ ක්රමවේදයක් සකස් කර ඇති බව එහිදී සුරාබදු දෙපාර්තමේන්තු නිලධාරීන් කාරක සභාවට දන්වා ඇත.
කෙසේවෙතත් එම ක්රමවේදය පිළිබඳ සෑහීමකට පත්විය නොහැකි බැවින් ජූනි 30 වනදා වන විට අදාළ හිඟ බදු මුදල් අයකර ගැනීමට කටයුතු කරන ලෙස කාරක සභාව නියෝග කර තිබේ.
2024 වසරට අදාළව පළමු කාර්තුව තුළ සුරාබදු දෙපාර්තමේන්තු ඔවුන්ට ලබාදී තිබු බදු මුදල වන බිලියන 52න් බිලියන 51ක් මේ වන විට එකතු කර ගැනීම මගින් දෙපාර්තමේන්තුවේ ආදායම් ඉලක්ක සපුරා තිබීම පිළිබඳව මෙහිදී කාරක සභාවේ ප්රසාදය පළ වී ඇති බව සඳහන් වේ.